玩大咗

又要面臨冇工人嘅日子

一早同啲仔去canteen食完早餐就自己一條冷去剪番個靚髮，中途無大聊打返屋企睇吓啲仔返到屋企未，點知打爆個手機屋企都冇人接電話，終於打到個仔嘅手機，原來兩個衰仔落咗街去咗彈波，個工人又唔喺同佢哋一齊，屋企又冇人聽電話，你話佢死鬼咗去邊？個大仔又支吾其詞，一時又話個工人喺屋企、一時又話個工人去緊接佢哋，聽到我火都嚟埋。

一早已經就唔喺好鍾意依個超有性格嘅工人，忍得到嘅我都唔出聲，隻眼開隻眼閉吞鬼咗落肚就算，哈！今次妳重唔斷正，越諗就越嬲，點可以任由我兩個仔落街。二話不說就call埋個agent返屋企問個夠竟，加埋我已經忍咗好耐冇出聲一次過同agent順便投訴埋，一鑊過炒哂出嚟。

事原喺個大仔一返到屋企就攞埋個家居手提電話落街，佢個死蠢以為喺街度都可以接到電話，我就會以為佢哋乖乖哋喺屋企，所以個工人喺屋企就聽唔到電話响，不過點都唔可以任由我啲仔自己落街又唔報寸架。佢比agent-Bonnie話咗幾句加埋簽咗份一個月之內如果表現冇改進就當已經比咗一個月通知可以即炒嘅warning letter。我條氣先至順番少少。之後就同Bonnie去下午茶吹水。

跟住未完，個工人之後話唔想再喺到做，因為簽咗封信就等於比人炒魷魚，不如自己先講唔做。嘩！我聽到之後開心都嚟唔切啦!我個心都已經想炒佢好耐，不過唔想攞咁多錢出嚟搞咁多嘢咋。

現今的小孩真幸福

依家啲細路仔真喺好幸福，啲父母會花盡心思同佢攪個生日派對，我哋嘅年代邊有咁幸福呃!我到依家個腦海裡面都冇小時後過生日啲片段，無聲無色咁就過咗十幾年先至話有個生日蛋糕切吓咋!

以前喺麥當勞度攪個生日會已經威威架啦，原來依家已進升到去啲會所度攪，重要比麥當勞有新意添。大仔二年級個陣個同學就喺香港鄉村俱樂部開生日會，細仔個同學尋日就喺深灣遊艇會開生日會，原來依家開切有關小朋友啲設施就一定有得做。

去到深灣遊艇會三樓嘅兒童夢幻樂園，我見到都嘩咗一聲，好似鄉下婆出城咁!地方雖然唔喺好大，但喺都足以比啲小朋友盡情去玩，連slide 都有幾款，有啲成兩層樓高45度角滑落嚟，睇落都幾刺激。唔好話啲小朋友玩到唔想走就連啲大人都忍唔住都去玩吓。重要就喺啲Booking喺一個接一個，爆哂!


其實依家賺小朋友錢真喺好容易，價錢幾貴父母都一定肯比。

白雪公主做型

一年一度嘅年會又到，上年喺中山倒數，今年就去珠海倒數，都唔知點解餐餐都要揀依啲咁嘅日子開會，攪到我兩年都冇得同啲仔一齊過除夕夜。今次重要玩咁大每個省都要表演一個節目添! 米玩啦!叫我哋依班金草演員上台演話劇，未睇都已經笑死人囉!

我哋一致決定表演雪姑五友，好彩Gloria班到成套服裝番嚟，咁就唔使咁頭痕。話時話我喺Wyeth都已經奉獻咗我兩次嘅第一次，第一次喺保齡球比賽，今次就喺上台表演。真喺我驚到時只喺掛住笑咩台詞都會唔記得哂。

雪姑依個角色都有三位後選人
有可愛嘅...
有硬朗嘅....
有嬌俏嘅....

終於打破宿命

由年初一開始賭乜都輸, 打麻雀連十蚊都未贏過, 以前連輸幾場麻雀我都未驚過, 但喺今次真喺輸到怕, 真喺打到謝哂!…啲雀友約襯都盡量避得就避…

今次真喺避唔到, 已經推咗好多次都要出席一次架, 以後手痕未冇得過手癮!

當我去緊會長屋企途中懷住戰戰驚驚嘅心情, 諗緊…唉!今晚又唔知要輸幾多, 坐底四方城死就死啦!

好彩今次終於打破宿命, 重見天日啦!真喺要多謝依排贏到開行嘅Peony過啲真氣比我, 比我有番啲做人嘅希望…. "掂呀"

“死亡筆記 - 最後的名字”

早兩日Blogger個server有事, 冇辦法發佈文章....依家補番....

11月3日星期五

上次同亞四一齊睇"死亡筆記"第一集，今次佢竟然另結新歡星期日約咗卡生同露姐嘆完個Brunch先去睇"死亡筆記 - 最後的名字"。好彩今次有亞二得閒陪我睇，亞四都算唔話得，用佢啲分數上網幫我哋訂飛之餘重同我哋去攞埋飛添。

“死亡筆記 - 最後的名字” ─ 估唔到全場竟然爆滿，成個劇情可以講話冇乜悶場都幾緊張。

9點幾睇完之後就去踩亞四同卡生場，去咗維園間巴西燒烤餐廳，宵夜價$68+10%，食物唔算好多，不過最低喺加$35红酒任飲，四個人一路吹水都起碼隊咗3至4支，飲到都有啲wing wing哋，傾到人哋要拉閘先肯散band。

睇完"深情密碼"會出唔到聲?

唔知點解每到月尾日子就會比人激到好唔開心，真喺準過個個月都嚟探訪嘅親戚。星期日晚比個位德sir激到爆燈，打爆個電話都接唔通，明知已經嬲到爆炸嘅我連同我講一聲sorry都冇。

個細仔星期二就開始測驗，重懶懶閒掛住玩，真喺皇帝唔急太監急。捉住佢温書就好似要佢上刑台咁，一個鐘先温到一板 (真喺嘔哂血)。由於前晚比德sir激襯，心情好差，我真喺驚自己控制唔住會出手車埋去。

終於用咗兩晚時間煲哂成套”深情密碼”(共28集)。 尋日咩都唔理化憤怒為煲碟力量睇足14集，感性嘅我起碼喊咗五集以上。不過，都冇睇“一公升眼淚”喊得咁勁。今朝一起身照鏡都比自己對腫眼嚇襯...

起牀後冇咩機會講嘢，返到公司一開聲以為大AL嚟咗， 我把聲...我把聲又沙啞又走音， 要出力先可以講到嘢，唔通狂煲成套“深情密碼”就會好似劇中女主角趙深深(朴思惠演)咁要啞足13年?我諗最開心應該喺德sir三父子囉!

BBQ

尋晚一大班兄弟姊妹們去爆炸同咖喱嘅新居將軍澳廣場個club道BBQ. 起初我以為係喺個鐵pan上面煎個隻, 原來都喺用义义住燒, 咁就有番的BBQ嘅風味. 真喺多謝爆炸嘅爸爸同媽媽6點幾就同我哋霸爐, 啲男人去到第一時間緊喺去起火啦!....點知要攪咗差唔多8點先有得燒, 個火都算起得好正. (辛苦哂...喺同我個肚講咋....一早已經餓到咕咕聲....). 不過最美中不足嘅喺只可以燒到10點, 真喺到喉唔到肺, 無法啦因為喺正啲住宅下面.

最後都剩番好多嘢, 我諗爆炸同咖喱都有排先可以清得哂啲野食, 見到咁多肉都驚!!!

猜謎語 - 兇惡的午餐肉

平日午餐肉一見到公仔麵就會打公仔麵。有一日，午餐肉見到意大利粉就打…點解呢?

6L裝嘅紅酒

今日去灣仔東園金閣慶祝李Sir榮升做警司, 李Sir私人豪咗支6L嘅紅酒, 見過咁大支紅酒未? 有成6L咁多, 足足比一支普通裝大6倍…好大碌呀!!!!

慳番一條蕉

今日臣哥入嚟我哋office無無聊聊吹咗幾句水。我個幾條蕉竟然吸引到減肥中嘅佢食咗條。本來我都諗住要請佢食多條先得喇…好多friend都話我個Google Search Bar 太低，詢眾要求張個Bar放番高啲位置。唉！我依個電腦白痴師奶又點會咁醒識攪喎!話哂臣哥都研究咗個adsence到天矇光，一定瞭如指掌喇。Gloria話最多請佢食多條蕉叫佢教我…..

哈哈！終於比我攪到lu…蕉都慳番….各位!依家喺唔喺好啲呢?

Death Note Episode 2 RAW- Part 1 (RAW)

睇Death Note, 唔會變碌木...

Bowling Competition

終於到了保齡比賽, 真的好緊張 ~~~ 以前讀書就話有參加啲乜鬼嘢運動比賽, 自從出咗嚟做嘢就已經好多好多年都冇參加過什麼比賽.
比賽喺奧海城二期, 現場氣氛好熱鬧, 有成二十幾間藥廠. 我打第二組7點到9點, (First team有Chris, Kelvin, Jackie, Maggie, 唔記咗添(後補), Second team有Ernst, Jeffrey, Martin, Johnny and me), 吓!我都喺第一次知道打保齡比賽喺限時間. 攪到個個人都更加緊張…其實我都同自己講擋練波咁打就得架啦….唉!都喺衰咗!
間間啲女隊員都喺打最後個個, 但喺我就打第一個個, 都唔知喺唔喺玩嘢, 攪到我壓力更加重….
第一局…冇眼睇囉!一百分都冇!真羞家…
第二局…好彩…都有156分…起碼對啲隊員有番啲交代…
第三局…以為第二局打順咗就會好啲啦!...點知…都喺咁差…一百分都冇!喺個一刻真喺想縮細自己…睇我唔到!睇我唔到!
個個基本上都打得好好, 喺我拖累哂整隊嘅分數….好彩有Ernst依個高手坐鎮, 佢好輕鬆咁就攞咗男子個人冠軍211分…女子個人冠軍就第二間藥廠182分…好勁呀!我哋Wyeth就攞全場第三名…成績都唔錯掛! 如果我保持平時練波嘅水準, 我諗都可以得第二名囉!真喺冇面面對佢哋…..

Bowling Practice

尋日又去咗奧海城打保齡，連打五局真喺打到手都軟埋。尋日真喺好邪，個個都好多時都打出大分瓶，唔大都小分瓶。第五局我重有成六球都喺分瓶，真喺考我啲技術咩!我都喺咐咐碌碌架咋…邊有Ernest咁professional，私家手套、私家鞋、私家波都有兩個，球技重好好添，高手高手！

打完之後見到有啲骨頭咁嘅物體喺G/F，就同Johnny落去八吓，原來就喺啲出土化石，好彩唔喺好多人，我哋都唔蝕低差唔多隻隻都影吓，順便試吓自己部手機嘅質數...

旺角風味薯片

今日下午得我哋三條女喺公司, "歌利亞"做到悶悶哋口痕痕想拮吓魚旦, 不過我同"打比"都唔想食, 佢唯有一條冷落去買一串咁多啦!…點知佢喺7仔買咗一包新口味嘅薯片返上嚟. 哈!食落又真喺有啲腸仔味喎!…唔知幾時會出~~流浮山嘅生蠔味~~鯉魚門嘅海鮮味~~屯門嘅B仔涼粉味~~齋舖嘅酸齋味呢? 到時就道道都唔使去, 攞住幾包薯片就可以食盡全香港美食囉….

Changing Partner

下午…唔知點解講講吓同性戀者又會講到Changing Partner依個玩意….
雖然已經唔喺好特別嘅話題, 但喺我就從來冇諗過喺大家都喺同一個哋方攪嘢比對方睇住…我當時諗最慘個個一定喺坐冷板凳冇得攪個個…Michael話有啲可能要排隊….重要排隊派籌添….

痔瘡膏可以除眼袋

Michael真喺乜都冇有怕…佢一早上咗個網站睇到個討論區, 討論緊”痔瘡膏可以除眼袋”. 佢竟然真喺攞咗支痔瘡膏嚟試吓…
Gloria重同佢影埋相添…做番張整容前同整容後嘅相…雖然依個傳說我哋都有聽過, 我哋又喺賣白宮痔瘡膏, 但喺從來都冇個員工感試, 因為最驚喺生油脂粒囉…
睇你啦!… Michael…傳說喺唔喺得就睇你啦…..勇呀!

酒量太差

尋日去咗銅鑼灣廣場2期9樓間Baby Blue Cafe & Bar (女士 $118,男士$138 任飲)。已經好耐冇成班人一齊出嚟飲酒lu，估唔到B仔一吹雞就有成十幾人出嚟。
唉!都唔知喺唔喺太耐冇劈過，好似飲咗唔喺好多就已經wing wing哋….好彩都頂到最後先走人….都唔喺好記得自己點樣入到屋企lu.....

名副其實過山車

食完午飯就去咗好似叫做五桂山公園，要坐吊車上山，喺山上可以望到珠海一帶地方，只喺睇吓風景，之後點落山呢?落山有三個途徑....1) 坐番吊車落山 2) 自己行落山 3) 坐過山車落山….我哋揀咗最刺激嘅過山車…(上次去喺自己控制)不過今次有專人坐喺最前面控制，嘩!快到嘔(〝~〞')....唔使一分鐘就落咗山....同喺遊樂場玩個啲冇咩分别....今次真嚇死仔....

中山之旅

英明神武戰神 幾有形…成團人一聽到如果中咗戰靶中間個點就可以有免費嘅石岐乳鴿一隻….點知!!!!唉!!!都喺要自己比錢….雖然細細隻不過就好好味，重有好似乒乓波咁大彈口鯪魚球…

嘩! 原來我已經成二十日冇上過Blog….

上星期去咗Wyeth outing去咗中山、珠海同澳門，哈!去開旅行真喺會上癮，雖然成個旅程都幾辛苦，但喺個種感覺喺你可以將香港所有嘅嘢抛於腦後，咩都唔洗諗…盡情relax去玩……

淺草寺 - 雷門

落機第二日去咗必到嘅淺草-雷門, 未去個日本就一定會去行番轉, 其實都冇咩好介紹. 原來個道個男女厠都好大, 大到連大門都冇, 完全睇哂啲男人喺道小解, 啋! 好彩個女厠個個都有獨立門咋!

超甜MOMO

上次睇到奶奶去完日本返嚟啲相, 佢影咗啲勁大MOMO, 睇到已經流哂口水. 好彩今次去日本都可以親口食咗個大過壘球嘅MOMO, 500Yen兩個真喺超低.

再食埋黃色個隻, 雖然冇紅色個種咁大, 但喺都好好味, 肉質比前者爽, 兩種味道完全唔同. 我喺香港都未見過, 就算有我諗都唔平囉! 好味!

Kadoya Hotel

奶奶介紹我哋住喺新宿西口嘅Kadoya Hotel, 睇落間Hotel似Motel多啲, 雖然間房比上網睇嘅差好遠, 不過麻雀雖小五臟俱全, 勝在樣樣設備都有, 房租都唔算貴(13,500Yen-1晚)又近地鐵站, 靜中帶旺, 附近重有好多嘢食…..正!奶奶真喺好介紹重幫我訂埋房添. 唔該哂奶奶!

今日終於可以返到屋企食飯

29號--喺日本返到香港已經攰到死死吓, 一撻落牀已經不醒人事. 都喺自己張牀最舒服.

30號--放咗工之後去咗澳海城打保齡, 主持人Ernest 訂咗4條lane由7:30pm - 9:30pm, 去到以為會有好多人, 點知數埋得個8-9個人. 少人都有着數, 等我同Johnny兩個人可以獨霸一條lane, 幾爽.....每人連續打咗5局有多, 嘩!真喺打到手軟....

31號--老公話應承咗啲仔去游水, 我諗住側側膊唔帶游泳用品唔去游啦! 成個星期冇做運動, 加埋連打2個鐘保齡啲手腳已經撒哂. 點知佢哋好到話幫我帶哂所有用品等埋我先游, 唔去唔得啦.....

今日痕痕哋去跳番堂Belly Jam, 鬆番吓啲筋骨......去咗日本幾日大大話話都肥咗幾磅, 都要勤力啲跳番幾堂舞先得囉....

失望的日本餐廳

尋晚同啲姊妹去咗尖沙咀柯士甸路間”松屋” 日本餐廳食所謂嘅任飲任食 (友情價$150net 一位), 之前去過金鐘個間食Lunch 同 Dinner 都唔錯, 但喺尖沙咀依間我就覺得麻麻哋. 食物款式唔多, 不過味道都叫做唔錯, 但喺就好嘈好嘈, 如果唔喺”松屋”個名似日本名之外, 就咁行入去一定冇人知喺一間日本餐廳囉….希望啲姊妹唔好怪我帶佢哋去咗一間好地檔嘅日本餐廳, 我都喺第一次去咋….

頂心頂肺

尋晚比個工人激到爆燈, 已經好多嘢都隻眼開隻眼閉都唔出聲架啦, 頂佢個肺重要搏嘴搏舌添, 依家都唔知喺我打佢工定佢打我工? 嬲到我成晚都瞓唔著.....成集倚天屠龍記都煲哂....等我去完旅行佢就知.....

博哂老命

今日真喺過哂癮, 從未試過一次過跳三堂舞, 跳完之後先知道味道, 腳都軟埋, 不過出咗一身汗真喺好爽...爽哂!終於可以回本...哈!哈!

一個月限期

牌就攤咗, 都唔知日後會唔會有改變, 一個月之後我諗都應該知道自己嘅去向, 唔好再話我恨心拋開哂所有嘢唔理就走咗去.....
我真喺唔想一個月一小吵三個月一大吵, 依啲咁嘅生活唔知可以頂得幾耐....放過我啦!!!!!!!!

一個Gentleman

尋日放工望吓好似冇咩落雨塊地重乾乾哋, 就諗住唔帶雨傘博一博, 都唔知個天喺唔喺有心玩我, 一出幢大廈就開始落微微雨, 諗住行過對面都喺幾步路, 點知忽然間有個Gentleman話遮埋我!?!?!當然我更喺話唔使啦, 佢話都喺過對面啫, 好啦!見佢咁誠意權權就比次機會佢, 咁就行咗過對面喇. 以為過咗對面佢就會自己鬆人先, 哈!點知佢重話遮埋我過去MTR添, 不過喺個個moment我都未想返屋企住所以就請佢食咗個檸檬. 依啲Gentleman真喺好少有囉!真喺希望佢出於內心keep住去幫人.....

死心吧!

已經到咗冇藥可救嘅地步.....

惠氏一週年

睜吓眼做咗惠氏正式員工剛剛好一年, 年紀越大就覺得時間過得越快, 真喺有啲驚哦! 話時話我點都冇諗過會喺一間藥品公司工作, 而重係一間名牌添. 做落咗先知道原來每件產品或者贈品唔喺我哋喺街行過見到咁簡單, 中間原來要經過好多重嘅工序同安排. 依幾日真喺做到上氣唔接下氣, 但喺當我今日行過屈臣氏見到我哋啲產品有某啲工序喺我有份安排嘅時候, 條氣都順番哂重好有滿足咁添. 真喺做到老學到老, 我真喺要多謝一個人就喺.......Jerry, 唔喺佢我又點會識到Gloria, 唔喺Gloria我點都冇諗過入惠氏喇! 真喺多得佢(Jerry)唔少, 哈哈!

公司人唔算多得個八丁友, 起碼唔會攬小圈子...我鍾意(最好就可以開兩枱麻雀就very good喇)! 冇是非...我鍾意耳根清靜! 每日都有啲攪笑嘢...我鍾意(好過死做爛做, 做到人都癲)!唔使收遲工.....哈哈我就最鍾意喇! 如果人工$$可以再多啲....我就更加鍾意喇!哈哈哈!

真想人間蒸發

依幾日真喺做到上氣唔接下氣, 真喺工作繁忙私事心煩. 紫微斗數話我今年會好亂, 點都要轉車. 有時真喺唔到你唔信, 都唔知下半年點過, 唉!

一把年幾又已經冇乜用腦嘅我, 諗住揾份安安定定嘅工作, 最好唔使用腦冇壓力, 份人工夠使, 唔使每個月攤開手板問人攞錢就已經好滿足. 但喺我條整定嘅辛苦命就真喺次次都喺摟轉唔到依個宿命. 好似Kelvin Leung話齋, 應命啦!

以為晨咁早嫁咗人就可以做個普通嘅少奶奶, 有人分擔吓喜怒哀樂, 點知...唉!嫁咗一個不聞不問, 成日用發脾氣嚟解決問題嘅人, 真喺心淡......仔就要生, 但喺就唔教唔理. 我諗...唔喺我一個人嘅責任掛!好想搬開住, 睇佢一個人點攪.....

今年真喺黑過墨豆, 打襯麻雀, 一贏三我都喺輸最多個個. 尋日無無聊聊捉咗兩個仔打番幾圏, 好彩都有贏唔喺就瘀死, 輸比兩個乳嗅未乾嘅細路真喺要出年先可以見啲雀友囉! 贏咗二十幾粒瓜子都補唔番間廠啦!

有時真喺唔喺迷信, 樣樣都可以改, 但喺條命就真喺冇得改, 應命啦!

我要放大假

我要放一個好長好長嘅大假休息吓, 學吓啲人不聞不問嘅處事態度, 橫掂依家我所講嘅說話個個都喺當耳邊風, 不如我就慳番啖氣暖吓個肚好過.

踢你入會

尋晚一班廖太同Annie喺中環香港華商銀行公會食晚飯慶祝生日, 啲餸菜味道都過得去, 不過尋晚似笑飽多過食飽, 啲話題完全III, 直情喺兒童不宜.....

散band之後我就去銅鑼灣join我班friend, 今次我哋諗住健康啲飲啲冇酒精嘅嘢, 揾個地方可以傾吓計, 玩吓牌或者玩啲益智嘅遊戲. 於是就揀咗一間喺波斯富街XX號3樓一座舊樓叫Nutrition Cafe, 地方唔算大環境都OK嘅....不過就得個一匹分體式冷氣機, 都唔知夠邊個涼, 入到去連埋我哋都已經full哂...坐咁耐就熱咁耐直到埋單都喺流緊汗....
入到去--
1. 每個人就要填張form做member, 唔填就冇會員價....(焗填喇, 唔做member冇得平, 都差成幾蚊杯架)
2. 每個人都要order飲品, 唔叫唔得個隻....(都喺嘅, 冇理由齋坐架)
3. 開始order.....(我哋一共有七個人)
a) 大明:凍咖啡....咩話! Cafe竟然冇咖啡? 焗住叫第二啲 (因為唔可以cancel order)
b) ee:凍檸檬茶....咩話! 竟然又冇茶?
c) 3杯不同款式XX+奇異果果汁....咩話!又冇奇異果.. 竟然只可以供應到2杯有奇異果(B仔同Jessie飲咗一啖就唔想再飲第二啖...超難飲), 第一次見嘅亞sir就唔好彩要叫第二樣(叫咗一杯唔知咩嘅朱咕力....飲哂都唔知喺咩味...)
d) 我就叫咗杯蘆薈蘋果梳打. ..咩話! 又冇蘋果? 唉! 咁蘆薈檸七有喇掛....嚟到之後一舊蘆薈都揾唔到連味都冇, 重要喺罐裝light 7, 個餐牌不如就咁寫檸七未算囉...重要收30幾蚊杯添....

坐咗大半個鐘都喺忍鬼唔住埋單走人....有個好似老闆娘tone嘅人重要走過嚟sell我哋喺元朗啦....旺角啦....同灣仔都有分店, 叫我哋得閒去幫襯吓....唔好啦掛!重去?

最後未死死哋氣去番Bar道飲啤酒傾計......

思覺失調

今日真喺超勁思覺失調, 成日以為今日喺星期五, 聽日喺星期六.
早上我亞姐因為要開會就交低咗件差事比我非常urgent, 就喺叫個Vendor幫我哋攺個artwork今日之內要攺好, 準備聽日交比個同事順路遞入去衛生署 (有啲其怪感覺). 點知, 到咗兩點幾都重未收到個artwork, 於是就打比個Vendor, 點知佢公司個電腦出現問題攺唔到, 要等佢返到屋企先可以做到, 最快都要聽朝先可以send到比我哋...咁我就話聽日我哋會冇人返公司, 今日之內一定要整好, 就算佢話聽朝一早放個artwork hard copy 喺我公司門口, 我都喺死都話聽日喺會冇人返工...後來終於喺放工前攪掂哂, 終於可以鬆番一口氣. 之後同啲同事傾傾吓先醒覺今日都重喺星期四, 唔喺!我一定唔會教定鬧鐘起身, 早餐肯定食硬豉椒炒魷.....

減肥失敗

唉! 減肥真喺一件唔容易嘅事, 我又唔想食藥物, 又唔想去啲所謂纖體公司, 一來收得貴, 二來一唔繼續 join course 就會好似吹波一樣, 重漲過之前....我用過嘅方法有:
水果當午餐
失敗原因 - 1. 日日食真喺食到悶, 又快肚餓, 成日都好想食嘢, 食得多生果果糖又太多, 一樣肥.... 2. 唔通日日都唔同啲同事去食飯咩, 一來佢哋會話你唔合羣, 二來有時都要收吓風,有冇啲咩特別新聞...
做運動
失敗原因 - 都唔知自己喺唔喺得到個怪病, 平時唔做開運動好地地, 諗住學人懶健康咁, 懶有恆心咁, 做咗幾次之嘛,就開始有感冒蹟像...次次都唔信邪, 但喺次次都好鬼靈....

依兩個最佳減肥法對我真喺有啲難度....

第一次

嘩!原來要攪個Blog真喺唔容易, 睇人哋post上去又靚又精彩原來真喺唔間單, 比個"叻"字佢哋。

喺依個世界錢真喺咁重要

錢真喺大哂, 有佢又煩, 冇佢重煩.....