我要告誡

這幾天真的不好受，總是覺得將會很快爆大鑊，希望我是多疑吧！一時的放縱使我好有犯罪感，這個感覺真的不好受，但當時又冇法控制到自己，都喺酒精累事，呀！點算呀！

冇主孤魂

自從Mary臨走前張啲Accounts最煩嘅嘢比翻Finance做之後，真喺清閒咗好多。新老闆又臨時延遲一個星期先返工，我哋就好似一班冇主孤魂咁週圍游。不過最煩都喺個個人都走嚟問我依樣點個樣點，鬼知咩！我喺度得個幾個月，所知嘅嘢都喺有限公司加上喺Reception點做倒內部啲嘢呀！Mary又冇past過啲嘢比我。

終於到咗星期五，紫色咀嘅新老闆“Man”星期一返工，到時佢就有排煩lu。

燒咗兩日碳

放咗幾日假同啲仔去長洲住咗兩晚，燒咗兩日碳。雖然天氣唔喺太好，但喺天公對我哋都算唔錯。經朋友介紹去“永佳”租咗一間都幾清雅嘅渡假屋，地方都算幾大又有露台可以燒野食，開住部冷氣，一路睇電視一路燒，幾爽架！其實最主要都喺比啲去仔騎吓單車，因為長洲最好喺冇汽車，勝在比起市區安全，閒日人又少，真喺路路暢通，又可以去海灘玩吓，玩到成身濕哂就可以好快返到屋企沖涼，放便快捷。對啲小朋友嚟講好過參加什麼旅行團齋睇齋食，成日都喺shopping，又要限住哂啲時間去玩，佢哋一啲都唔會覺得享受。

快樂嘅時間總喺好快過，真喺好唔想返工……

你會是他或她嗎？(2)

我發覺我哋由幼稚園開始就玩爭櫈仔依個遊戲原來喺好有用架，去到邊用到邊，雖然未必需要學都會識，但喺速度先至喺最緊要嘛！

地鐵剛剛先到達，幕門同車箱門慢慢開緊嘅時候，門都未開到一半那個男人個身都已經入咗一半，快過哂身後啲人第一時間揾個位低，重同個友人講：對面有個位呀！個樣好似贏哂咁！架車慢慢離開準備去下一站。去到下個站個個男人同個朋友一齊起身落車！！！妖！使唔使爭呀？男人老狗，企一陣都唔怕死啦！何況站與站之間相隔都只喺得個兩分鐘左右。啲人~~爭吓都喺好，真喺吹漲！

散水飯

喺Oxxx做咗幾個月除咗第一日返工同我個亞姐-Mary食過一次飯之外，都未同過我部門啲同事食過飯。尋晚終於可以柴娃娃五丁友一齊去食散水飯farewell Mary，都係喺香港華商銀行會，總算有頭有尾。

你會是他或她嗎？(1)

由星期一至五每日都好似安裝咗程式咁做差唔多嘅動作。早上鬧鐘一響就好不願意懶住身體離開張牀，兩隻眼好難得先可以睜開少少走入洗手間，刷牙洗面洗頭，攪完一大輪都已經過哂鐘就急急腳走出門口。一入到地鐵車箱就嗱嗱啉揾個位坐咗先，爭取每一刻閉目養神，义翻半粒鐘都喺好，冇理由望住啲人腳望半粒鐘架….

當你搭緊車嘅其間，有冇發覺有好多種無功德心或者衰人喺你身邊？又或者自己就係其中之一個呢!當你好無聊又唔眼瞓嘅時候，留意吓其他人嘅行為或者可以比自己一個警惕，起碼做少咗一樣衰嘢先啦！

上個星期四放咗工冇街地例搭地鐵返歸，每逄星期四地鐵都有本Metro Life免費任攞。放工時間搭地鐵當然人多啦，不過喺中環上車就冇朝早咁好彩有位坐，焗住要同人迫，迫吓迫吓就入咗去車箱嘅中間。其實迫都唔緊要最緊要喺有嘢扶住，當架車窒吓窒吓嘅時候就唔會撞到人嘛!

點知有位樣貌清秀嘅女子，披著一把長髮，懶靚咁成個人挨咗喺條鐵柱度睇本Metro Life，有冇自私啲架，我同另外一個女仕都一面無奈，喺個一刻真喺想叫佢借開比啲位人扶吓，但喺車箱入面成棚人，如果佢當時嘅反應態度喺負面嘅！咁咪有機會會同佢一齊上you tube “兩名俏嬌娃在地鐵為條柱唉咬”！咪攪！好！我忍妳！喺跌跌吓嘅情況下過咗兩個站，佢終於懶靚咁離開咗個車箱。你話呀！就算妳有幾靚但喺冇功德心就已經扣哂分啦！顧及吓周圍環境呀嘛！車箱入面冇人任妳點挨都得啦。如果萬一真喺有人因為佢嘅自私行為而受到不必嘅損傷就唔好啦!

男士們！如果你哋要揾女朋友千奇唔好揾類同依種“自私精”，咪話我睇死佢，佢對你身邊啲家人同朋友未必好架!又或者你喺同佢一樣囉！

傳染病

近排間銀行好似染上辭職病毒，今日又收到風有四個同事唔DO，快到聽日已經有兩個last day添。唔通依度嘅工作環境真喺咁差？定喺出面嘅市道好咗好多？相比之下我真喺算好清閒既一個，雖然返工時間比正常長咗少少，總算都可以準時收工個隻。每日淨喺見到HR 不停咁Interview，佢唔覺得忙我都覺得忙啦！何況HR得one man band.

壞消息

尋日我個亞姐同我講咗個壞消息，佢做到今個月10號咋。我哋雖然相處咗只有五個月左右，但喺佢對我總算唔錯架，最少唔使我開OT，未夠鐘都叫我收工添，起碼佢唔會比第二啲部門"恰"到我哋先啦！有時我都要幫佢做啲Admin. work，但喺佢都唔會迫我好快交功課，大意嘅我做錯嘢佢都冇柄過我囉….唉!第日都唔知會請個乜水返嚟，大家都有啲擔心，正所謂一朝天子一朝臣。我驚到時唔止淨喺做Reception啲嘢~~~~~唔通真喺要提早返歸睇人面色受人氣？？